Y Moddey Oaldey as y Tarroo-Choo

Y Moddey Oaldey as y Tarroo-Choo
Liorish Gabriel Rosenstock
Çhyndaait gys y Ghaelg ec Peddyr Mac Niallan

T’eh feayr,” as y moddey oaldey. Va’n kiart echey. V’eh feer feayr. V’eh cho feayr shen nagh daink y ghrian magh – hannee ee cooyl chlea boayl ennagh.

Minnid ny yei shen as eshyn: “Ta accrys orrym!” Cha nee breag v’ayn. Va accrys agglagh er. Cha row eh er n’ee lhongey kiart rish daa laa.

Minnid elley ny yei shen as eshyn: “Shegin dou red ennagh y gheddyn ry-ee!” Ghow eh toshiaght shooyl.

Cheau eh yn slane laa shooyl. V’eh gaase faase. Haink yn oie. Dy doaltattym honnick eh soilshey. She thie eirinagh v’ayn. Cheayll eh ny kiarkyn.

“Bee kiark aym,” as y moddey oaldey. “Cha nee – bee daa chiark aym!”

Eisht cheayll eh gounsternee.

“Cha nel kiarkyn gounsternee…” as y moddey oaldey rish hene dy hard.

“Ta kiarkyn – t’ad – cha noddym smooinaghtyn er yn ‘ockle…”

“Scolgarnee. Ta kiarkyn scolgarnee!”

“Ta’n kiart ayd!” as y moddey oaldey.

Tarroo-choo v’ayn.

“Tarroo-choo mie uss,” as y moddey oaldey rish.

“S’braew shen!” as y tarroo-choo.

Yeeagh ad er y cheilley.

“Cha nel accrys ort’s, vel?” as y moddey oaldey rish.

“Accrys?” as y tarroo-choo. “Accrys? Cha nel accrys rieau orrym.”

“Nagh vel?” as y moddey oaldey.

“Cha nel. Ta’n eirinagh goaill kiarail vie jeem.”

“Ta mee toiggal. As cha nel feayraght ort, s’cosoylagh?”

“Feayraght?”

“Ny paays?”

“Cha nel accrys, feayraght, ny paays ny red erbee myr shen orrym. Ta mish goaill kiarail jeh’n eirinagh as ta’n eirinagh goaill kiarail jeem’s.”

“Ta mee toiggal…”

Eisht honnick y moddey oaldey yn geuley.

“Cre ta shen?” as y moddey oaldey.

“She geuley shen,” as y tarroo-choo, “son mee y ‘reayll aynshoh.”

“Geuley?” as y moddey oaldey. “Bare lhiam’s paays, feayraght, as accrys y ve orrym na geuley. Slane!”

D’immee eh eisht. Va accrys er dy bra. Va, as paays. As feayraght. Agh, er y chooid sloo, v’eh seyr.


Çhyndaays jeh An Mac Tíre agus an Tarbhghadhar liorish Gabriel Rosenstock.

Ard-jalloo liorish BlackIce-Wolf.

Advertisements

Freagra

Líon amach do chuid faisnéise thíos nó cliceáil ar dheilbhín le logáil isteach:

Lógó WordPress.com

Is le do chuntas WordPress.com atá tú ag freagairt. Logáil Amach / Athrú )

Peictiúr Twitter

Is le do chuntas Twitter atá tú ag freagairt. Logáil Amach / Athrú )

Pictiúr Facebook

Is le do chuntas Facebook atá tú ag freagairt. Logáil Amach / Athrú )

Pictiúr Google+

Is le do chuntas Google+ atá tú ag freagairt. Logáil Amach / Athrú )

Ceangal le %s